Yasmeen Hameed
ata-e-abr se inkar karna chahiye tha
main sahra thi mujhe iqrar karna chahiye tha
lahu ki aanch deni chahiye thi faisle ko
use phir naqsh-bar-divar karna chahiye tha
agar lafz o bayan sakit khade the dusri samt
hamin ko ranj ka izhar karna chahiye tha
agar itni muqaddam thi zarurat raushni ki
to phir saae se apne pyaar karna chahiye tha
samundar ho to us men duub jaana bhi rava hai
magar dariyaon ko to paar karna chahiye tha
dil-e-khush-fahm ko subh safar ki raushni men
shab-e-gham ke liye tayyar karna chahiye tha
shikast-e-zindagi ka aks ban kar rah gaya hai
vahi lamha jise shahkar karna chahiye tha
Leave a Reply