Khalid Akhlaq
shafaq sitare dhanak kahkashan banate hue
vo is zamin pe mila asman banate hue
bhaTak na jaa.en mire baad aane vaale log
main chal raha huun zamin par nishan banate hue
chalo ab un ki bhi basti men phuul baanT aa.en
jo thak chuke hain ye tir-o-kaman banate hue
mire vajud ki rusva.iyan tumhari qasam
hai dil men ḳhauf phir ik raz-dan banate hue
jala.e haath tahaffuz men varna andhi se
charagh bujh gaya hota dhuan banate hue
paḌa hua hai vo tarikiyon ke malbe men
ḳhayal-o-ḳhvab men ik kahkashan banate hue
yahi ho ajr mire kar-e-ḳhair ka shayad
akele rah gaya ḳhud karvan banate hue
zamin pe baiTh gaya thak ke do-ghaḌi ‘ḳhalid’
amiir logon ki vo kursiyan banate hain
Leave a Reply