doston ki bazm men saghar uthae jaenge
chandni raton ke qisse phir sunae jaenge
aaj maqtal men laga hai sar-phiron ka ik hujum
phir kisi qatil ke jauhar azmae jaenge
zikr phir guzre zamanon ka vahan chhid jaega
vaqt ke chehre se phir parde uthae jaenge
chal padega phir bayan ik chand se rukhsar ka
yaad phir zulfon ke pech-o-kham dilae jaenge
baat chal niklegi phir iqrar ki inkar ki
phir vahi bachpan ke bhule giit gaae jaenge
yaad aenge fasane yuun to sab ko bazm men
kuchh kahenge aur kuchh bas muskurae jaenge
jo andhere dhundhte hain munh chhupane ke liye
raushni ke ru-ba-ru ik din vo laae jaenge
maut ne har bazm ki surat badal daali yahan
rah gae kuchh yaar so vo bhi uthae jaenge
aa chalen ‘azim’ purane doston ke darmiyan
yaad ki basti men phir kuchh gul khilae jaenge
Leave a Reply