guzre va.ade ko vo ḳhud yaad dila dete hain
dil ki soi hui hasrat ko jaga dete hain
nau-giraftar-e-qafas hain nahin karte fariyad
jaan ko teri ye sayyad dua dete hain
talib-e-jalva-e-didar samajh kar mujh ko
ik jhalak si ruḳh-e-raushan ki dikha dete hain
zab.h karte hain taḌapne nahin dete mujh ko
tah-e-zanu miri gardan ko daba dete hain
apne mauqe pe har ik baat bhali hoti hai
shab-e-furqat men ye sadme bhi maza dete hain
ghair ke kahne se dar-gor kaha karte hain
jite-ji vo mujhe paigham-e-qaza dete hain
main vo qaidi huun ki sone nahin dete mujh ko
aankh lagti hai to zanjir hila dete hain
le liya bosa-e-ruḳhsar to kya jurm kiya
pyaar ki baat pe nahaq vo saza dete hain
sham-e-mahfil huun na ashiq na main bu-e-gul huun
mah-jabin kyuun mujhe anchal ki hava dete hain
un ke qabze men hai kaunain ki shahi ‘ashiq’
shaah vo de nahin sakte jo gada dete hain
Leave a Reply