dard-e-dil jaan ka azar hai main janta huun
aur allah madad-gar hai main janta huun
main bina kalima paḌhe bhi to musalman Thahra
haan mire dosh pe zunnar hai main janta huun
ek ik harf mahakne laga phulon ki tarah
ye tiri garmi-e-guftar hai main janta huun
rehn rakkhe jo miri qaum ke mustaqbil ko
vo miri qaum ka sardar hai main janta huun
zulm ke shahr ki sachcha.iyan likhne vaalo
chehra chehra yahan aḳhbar hai main janta huun
meri koshish se tire husn ki saari tafsir
chand lafzon men giraftar hai main janta huun
jis ko paane men ganva di hai ka.i saal ki niind
ab vahi bar-sar-e-paikar hai main janta huun
teri duniya men to aa.e hain payambar lakhon
kaun is fauj ka sardar hai main janta huun
hansti-gati hui duniya ki tabahi ka sabab
havas-e-dirham-o-dinar hai main janta huun
TuuT jaata hai har ik jaal yahan nafrat ka
ishq ke daam men sansar hai main janta huun
bhagna chahun bhi tujh se to kahan tak bhagun
har taraf tu hi numudar hai main janta huun
Leave a Reply