aftab-hussain

Shab-e-Siyah Pe Wa Raushni Ka Bab To Ho

shab-e-siyah pe va raushni ka baab to ho

magar ye shart hai koi sitara-yab to ho

main harf ban ke tiri ruuh men utar jaun

mira sukhan tiri mahfil men baryab to ho

savad-e-shab ke safar men sitara-var chalun

tire jamal ki lau meri ham-rikab to ho

kisi tarah to ghate dil ki be-qarari bhi

chalo vo chashm nahin kam se kam sharab to ho

asas-e-jism uthaun nae sire se magar

ye sochta huun ki mitti miri kharab to ho

vo ‘aftab’ lab-e-bam bhi utar aae

magar kisi men use dekhne ki taab to ho

More Poems

Leave a Comment