poet

Dekha Jo Marg To Marna Ziyan Na Tha

dekha jo marg to marna ziyan na tha

faani ke badle mulk-e-baqa kuchh garan na tha

shab ko baghal men tha bhi to vo dilsitan na tha

shokhi ye kah rahi thi ki yaan tha vahan na tha

be-vajh munh chhupane se jo tha nihan na tha

par khair thi kuchh is men ki main bad-guman na tha

ye to nahin ki ab ke vo mutlaq vahan na tha

lekin saval-e-vasl ye kahne ko haan na tha

vo but hi kahun zamin pe jo bala-garan na tha

ham-sang lekin us ka magar asman na tha

hasrat ke sadqe aankh ke malte hi khul gaya

vo kuchh ki mumkinat se jis ka bayan na tha

naala jo apna paya-e-tasir se gira

itna subuk hua ki main itna garan na tha

the bazm men vo ghuncha-e-afsurda sharm se

kyunkar kahun bahar men rang-e-khizan na tha

kaisi haya kahan ki vafa pas-e-khalq kya

haan ye sahi ki aap ko aana yahan na tha

sab kaam apni ek nigah par hain munhasir

goya mire liye to bana asman na tha

kyuun mujh pe tez ki nigah-e-qahr ki chhuri

main daur-e-charkh men koi sang-e-fasan na tha

kuchh apne dil ke valvale kuchh zahidon ki zid

sar phodne ko varna vahi astan na tha

aina ko vo dekhte hain un ki shakl ham

tha ham ko vo guman ki unhin vo guman na tha

inkar mahz mahz ghalat mezban sahi

maana ki bazm-e-ghair men tu mehman na tha

dushman harif-e-rah-e-vafa hai khuda ki shaan

vahan jis pe tha yaqin mujhe us ka guman na tha

hairan huun hijab-e-judai utha na kyuun

vo naznin the main to koi na-tavan na tha

ab asman ban ke mira muddai bana

thi lab pe kuchh fughan to falak ka nishan na tha

tapka zamin pe gar falak-e-pir ko to kya

phir ye kahenge sab ki vo kuchh naujavan na tha

kuchh jazb dil men jaan ke samjhe the un ko paas

ek vahm se yaqin pe kya kuchh guman na tha

gardun se aaj hai falak-e-zulm phat pada

siina men aaj hi dam-e-atish-fishan na tha

husn-e-jahan-faroz se jis ja na the vo but

main be-nishaniyon se jahan tha vahan na tha

yuun khamushi se khush ki vo tasvir the magar

yuun baat se ba-tang ki guyyan vahan na tha

bhari hue yahan to subuk hogi zindagi

vahan to nazar se ham ko girana garan na tha

the be-khudi men paas vo hosh aai to gae

chuke ghazab hi hosh men aana yahan na tha

aana ye un ka subh ko meri ajal ke saath

yaani ki nala-e-shab-e-gham raegan na tha

tha kuchh shikast-e-dil se mira imtihan-e-sabr

vahan apni nazuki ka faqat imtihan na tha

be-mehr yuun na ho ki ye khush ho ke main kahun

shayad ki tu raqib pe bhi mehrban na tha

main aur roz-e-vasl-e-adu aur shab-e-firaq

yahan asman na tha ki vahan asman na tha

farhad kohkan tha ye ik halki baat hai

ashiq tha be-sutun ka uthana garan na tha

shab mujh se aankh malti rahi dil raqib se

yahan yuun sitam raha ki kisi par ayaan na tha

tha doston ka yaar tariq aur dilon se duur

kya tha jo main ghubar-e-pas-e-karvan na tha

hairan huun ki dam men tire kyunki aa gaya

main varna apne dil men kahan se kahan na tha

marta huun ki kyuun na raha dil men tir-e-yar

aram-jan tha koi azar-jan na tha

dekha na aankh utha ke mujhe nazuki se jhuut

aisa to kuchh nigah ka uthana garan na tha

khali dar un ka paaya to dil vahm se ruka

tha pasban men aap jo vahan pasban na tha

kis be-dili se hijr men ki ham ne zindagi

dil tha kahan ki yahan vo but-e-dilsitan na tha

mit jaana apna us ka raha sab ke dil pe naqsh

ek ye bhi tha nishan ki mira kuchh nishan na tha

kuchh vahm sadd-e-rah-e-sitam tha ki vaqt-e-zabh

mere gulu pe khanjar-e-qatil ravan na tha

‘anvar’ ne badle jaan ke li jins-e-dard-e-dil

aur is pe naaz ye ki ye sauda garan na tha

More Poems

Leave a Comment