Ye Ghar Jo Hamare Liye Ab Dasht-E-Junun Hai

ye ghar jo hamāre liye ab dasht-e-junūñ hai

ābād bhī rahtā thā kabhī apno ke dam se

sau baar isī tarah maiñ mar mar ke jiyā huuñ

derīna ta.alluq hai mirā maqtal-e-ġham se

ye jiinā bhī kyā jiinā hai sar phoḌnā Thahrā

qismat ko hai jab vāsta patthar ke sanam se

bas itnā ġhanīmat rahe un se ye ta.alluq

ham apne ko badleñ na vo baaz aa.eñ sitam se

āvāz na do ‘shams’ ko taḌpegā bichāra

āzād to ho jaa.e zarā band-e-alam se

Leave a Comment