hamin to hain jo tire saath chalte rahte hain
vagarna log to raste badalte rahte hain
kabhi zamane ka gham hai kabhi tumhara gham
ghazal sunane ke pahlu nikalte rahte hain
nazar to aate hain ab phul-phal daraḳhton par
ye aur baat ki ham haath malte rahte hain
ye apni marzi ke malik hain in se kuchh na kaho
purane log hain girte sambhalte rahte hain
ajab udasi men ab ke guzar rahe hain din
jo kaam aaj ke hain kal pe Talte rahte hain
koi charagh sar-e-rahguzar bhi raushan ho
munDer par to diye sab ki jalte rahte hain
jhulasti ret pe ik buund hi uchhal kabhi
ye barishon men to dariya ubalte rahte hain
na aa.e vo lab-e-iz.har tak kabhi ‘faruq’
ki jazbe dil men to aksar machalte rahte hain
Leave a Reply