gard-aluda faza bina.i gard-alud thi
pattharon ke shahr men sunva.i gard-alud thi
pattiyon par thi raqam saare chaman ki dastan
aur chaman ki dastan-ara.i gard-alud thi
ḳhuun men Duubi hui kuchh ungliyan thiin soch men
duur vo tha hashiya-ara.i gard-alud thi
vo use oḌhe raha chehre pe ḳhushbu ki tarah
haan vahi jis shaḳhs ki tanha.i gard-alud thi
ab ki rut badli to phulon ko pasina aa gaya
ab ki ḳhushbu ki karam-farma.i gard-alud thi
main ‘tapish’ jin raghbaton ko oḌh kar phirta raha
vo dar-o-divar vo angna.i gard-alud thi
Leave a Reply