raat kaafi lambi thi duur tak tha tanha main
ik zara se roghan par kitna jalta-bujhta main
sab nishan qadmon ke miT ga.e the sahil se
kis ke vaste aḳhir Dubta ubharta main
mera hi badan lekin buund buund ko tarsa
dast aur sahra par abr ban ke barsa main
adh-jale se kaghaz par jaise harf raushan hon
us ki koshishon par bhi zehn se na utra main
donon shaklon men apne haath kuchh nahin aaya
kitni baar simTa main kitni baar phaila main
zindagi ke angan men dhuup hi nahin utri
apne sard kamre se kitni baar nikla main
aaj tak koi kashti is taraf nahin aa.i
paniyon ke ghere men aisa huun jazira main
kaTta tha har manzar dusre manazir ko
koi manzar ankhon men kis tarah se bharta main
Leave a Reply