Saqib Lakhnavi
ruḳh-o-zulf ka huun fasana-ḳhvan yahi mashghala yahi kaam hai
mujhe din ka chain azab-e-jan mujhe shab ki niind haram hai
tire intizar men hai taab ye mariz-e-hijr hai jan-ba-lab
kahin aa bhi va.ada-ḳhilaf ab ki yahan to kaam tamam hai
kahun hasraton ka hujum kya dar-e-dil tak aa ke vo bevafa
mujhe ye suna ke palaT gaya ki yahan to majma-e-am hai
na vo mehr-o-mah ki tabishen na vo aḳhtaron ki numa.ishen
na vo asman ki hain gardishen na vo sub.h hai na vo shaam hai
mire dam pe ishq men hai bani tujhe va.az-o-pand ki hai paḌi
mire naseha tujhe bandagi tiri dosti ko salam hai
na sata.en vo na sata.en vo idhar aa.en vo idhar aa.en vo
na sahi mujhi ko bala.en vo ye ḳhayal-o-batil-o-ḳham hai
tap-e-gham se hoti hai ab mafar ki tabib-e-marg hai chara-gar
mira qissa aaj hai muḳhtasar miri dastan tamam hai
hai kahan vo saqi-e-tund-ḳhu ki hai mai-kade men ye ha-o-hu
kahin sar-nigun hain ḳhum-o-subu kahin shisha hai kahin jaam hai
nahin dil ko fikr ye be-sabab gaya din kahan hui raat kab
mujhe roz-e-vasl hai ajab abhi sub.h thi abhi shaam hai
na vo mehman-e-harim-e-dil na ḳhayal is ka muqim-e-dil
hui qat.a rasm-e-qadim-e-dil na payam hai na salam hai
kahin husn valon ke darmiyan ye ghazal suni to kaha ki haan
ye hai nazm-e-‘saqib’-e-ḳhush-bayan ye usi ka tarz-e-kalam hai
Leave a Reply