Ahmad Mushtaq
khade hain dil men jo barg-o-samar lagae hue
tumhare haath ke hain ye shajar lagae hue
bahut udaas ho tum aur main bhi baitha huun
gae dinon ki kamar se kamar lagae hue
abhi sipah-e-sitam khema-zan hai chaar taraf
abhi pade raho zanjir-e-dar lagae hue
kahan kahan na gae alam-e-khayal men ham
nazar kisi ke dar-o-bam par lagae hue
vo shab ko chiir ke suraj nikal bhi laae
ham aaj tak hain ummid-e-sahar lagae hue
dilon ki aag jalao ki ek umr hui
sada-e-nala-e-dud-o-sharar lagae hue
Leave a Reply