Aankh Thi Suji Hui Aur Raat Bhar Soya Na Tha

aañkh thī suujī huī aur raat bhar soyā na thā

is tarah vo TuuT kar shāyad kabhī royā na thā

un ke shauq-e-dīd meñ thā is qadar khoyā huā

maiñ bharī mahfil meñ thā aisā ki maiñ goyā na thā

imtihāñ zauq-e-safar kā thā to sūraj sar pe thā

dhuup thī dīvār thī lekin kahīñ saaya na thā

vo baḌā thā phir bhī vo is qadar be-faiz thā

us ghanere peḌ meñ jaise koī saaya na thā

shāhrāh par ḳhuun meñ ik laash thī luthḌī hui

aa.e din kā hādsa thā is liye charchā na thā

har nigah pyāsī thī lekin vaqt kī tahvīl meñ

ik sarāb-āsā zamīñ thī duur tak dariyā na thā

Leave a Comment