socha tha tum ne dirham-o-dinar denge log
sar kaaT denge phir tumhen dastar denge log
iflas-o-tang-dasti ka e.ajaz ye bhi hai
mangoge gar qalam tumhen hathiyar denge log
pahle-pahal to vasl ki lazzat milegi aur
phir umr bhar ko hijr ka azar denge log
mujrim riha hue hain to ma.asum qaid hain
kis ko ḳhabar thi aisi bhi sarkar denge log
sach bolna hai jurm ye taslim hai magar
ik jurm ki saza mujhe sau baar denge log
bolun agar main jhuuT to mar ja.ega zamir
kah duun agar main sach to mujhe maar denge log
main hi karunga shahr ki miTTi ko suraḳh-ru
mere hi ḳhuun se chhap ke aḳhbar denge log
Leave a Reply