Akbar Hyderabadi
nigah-e-shauq se husn-e-gul-o-gulzar to dekh
ankhen khul jaengi ye manzar-e-didar to dekh
paikar-e-shahid-e-hasti men hai ik aanch nai
lazzat-e-did uTha shola-e-ruḳhsar to dekh
shoḳhi-e-naqsh koi hadsa-e-vaqt nahin
mo.ajaza-e-kari-e-ḳhun-e-dil-e-fankar to dekh
har dukan apni jagah hairat-e-nazzara hai
fikr-e-insan ke sajae hue bazar to dekh
ban gae gard-e-safar qafile avazon ke
adam-e-nau ki zara garmi-e-raftar to dekh
munqalib ho gaya paimana-e-har-bast-o-buland
dekh kar apni taraf janib-e-kohsar to dekh
nae ahang se ab naghma-sara hai ‘akbar’
fikr ke saath zara shoḳhi-e-guftar to dekh
Leave a Reply