chaman mahfuz hoga meri duniya miT ga.i hogi
jahan bijli ko girna tha vahin bijli giri hogi
kahan tak jabr karta dil pe aḳhir main bhi insan huun
tabi.at phir tabi.at hai kabhi ghabra ga.i hogi
badal jaa.e jo mir-e-karvan kya farq paḌta hai
agar jaada vahi hoga to manzil bhi vahi hogi
ḳhizan ka daur hoga mausam-e-gul ja chuka hoga
qafas se jab main chhuTunga to duniya dusri hogi
mujhe gham dene vaale zabt-e-gham ka hausla bhi de
yaqinan ba.ad is ke shan-e-gham kuchh aur hi hogi
bahar aa.e na aa.e main gareban chaak kar lunga
agar ḳhamosh baiThunga to ye divangi hogi
vo sham-e-hijr ho ya vasl ki shab farq itna hai
kahin teri kami hogi kahin meri kami hogi
hamare ashiyan par kab girengi bijliyan aḳhir
‘sa.id’ allah jaane kab chaman men raushni hogi
Leave a Reply