Shahid Jameel
tumhari yadon ko ilzam dete rahte hain
qalam ke haath men kuchh kaam dete rahte hain
jigar ko daagh nazar ko sarab dil ko fareb
ham apne pyaron ko in.aam dete rahte hain
jo kaam kar na sake us ke ru-ba-ru ja kar
ghazal ke sher men anjam dete rahte hain
dayar-e-dil ko khula chhoḌ dete hain aksar
guzarne valon ko ilzam dete rahte hain
miTate rahte hain likh likh ke tera gham dil par
aziyyaton ko koi kaam dete rahte hain
Leave a Reply