Sufi

Meri Hasti Ka Jalwon Mein Tere Ru-Posh Ho Jaana

miri hasti ka jalvon men tire ru-posh ho jaana

yahin to hai bas ik qatra ka dariya-nosh ho jaana

tumhen kya gham mubarak ho tumhen ru-posh ho jaana

hua jaata hai afsana mira behosh ho jaana

vahi samjhe hain kuchh kuchh zindagi-o-maut ka hasil

jinhen aata hai jiite ji kafan bar-dosh ho jaana

ye achchhi ibtida ki aap ne ai hazrat-e-musa

dam-e-didar ab lazim hua behosh ho jaana

zamin ka zarra zarra aina-dar-e-haqiqat hai

kahin apne hi jalvon men na tum ru-posh ho jaana

bisat-e-dahr men ghafil bhala jiine ka hasil kya

ki marna bhi jahan par ho vabal-e-dosh ho jaana

vo sar zaanu pe un ke vo hava zulf-e-moambar ki

hamen to hosh se badh kar hai yuun behosh ho jaana

nazar aate hain ab jalve hi jalve har taraf mujh ko

dalil-e-hoshiyari tha mira behosh ho jaana

vo uthna jalva-gah-e-naz ke parde ka nazron se

vo mera dekhte hi dekhte behosh ho jaana

kahin nakam rah jaae na zauq-e-justuju apna

adam se bhi khayal-e-yar ham-aghosh ho jaana

guzar ja manzil-e-ehsas ki had se bhi ai ‘afqar’

kamal-e-be-khudi hai be-niyaz-e-hosh ho jaana

More Poems

Leave a Comment