lab-e-rangin hain tire rashk-e-aqiq-e-yamani
zeb deti hai tujhe nam-e-ḳhuda kam-suḳhani
haar kal pahne the phulon ke nishan hai ab tak
ḳhatm hai gul-badanon men tiri nazuk-badani
sharm se aab hue nishkar-o-qand-o-nabat
dekh kar ai shakarin-lab tiri shirin-dahni
meva-e-bagh-e-iram us ko na bhave hargiz
taubar-e-bosa kiya jis ne vo seb-e-zaqni
jhuTe va.ade tire ai jaan karun sab bavar
dil shikasta na kare gar tiri paiman-shikani
shama-ruyon se jise sham-o-sahar sohbat ho
hai saza-var use da.ava-e-ḳhush-anjumani
is qadar mahke hai us kakul-e-mushkin ki shamim
justuju men hue ‘bedar’ ghazal-e-ḳhutani
Leave a Reply