Poet
ji chahe ka.abe jaao ji chahe but ko puujo
ye sun rakho ‘muhib’ tum ashiq kabhu na huujo
ḳhuun sau dilon ka hoga mashshata teri gardan
zulfon ka us ki TuuTa shane se ek mu jo
jis ja farishte ke par jalte hon paanv dharte
dil us gali men sar se shayan hai jaa.e tu jo
ik-dam men dekh liijo phir jeb para-para
be-fa.eda hai naseh karta hai tu rafu jo
kis rashk-e-mehr-o-mah ke sha.eq hain dekhne ke
hain mehr-o-mah phirte din-rat ku-ba-ku jo
pa kar tujhe halavat kya kya uThate hain vo
kuchh dil hi dil men teri karte hain justuju jo
kya kya na dagh-e-hasrat sab dil hi dil men khaven
majlis men gul-ruḳhon ki aave vo sham.a-ru jo
takta muqabil us ke kis ru se maah hove
garm-e-suḳhan ho zarra vo mehr-e-sho.ala-ḳhu jo
thi mauj ahu-e-chin aur sab habab naafe
dariya par us ne khole gesu-e-mushkbu jo
sail-e-sarishk mere pahunche hai gham men tere
gulzar men ravan hai ai gul ye ab-ju jo
gulshan men gar vo mai-kash aave sharab piine
gul ka bhare piyala ghunche ki hai subu jo
kaale ke kaTne ki chaḌhti hai lahr dil par
zulf-e-siyah us ki yaad aa.e hai kabhu jo
ma.ani-shanas hi kuchh rutbe ko us ke samjhe
ik tarz ka hai apna andaz-e-guftugu jo
ashiq na ham to hote par ai ‘muhib’ baghal men
dil hai vo dushman-e-jan piita rahe lahu jo
Leave a Reply