dil jahan se uthae baithe hain
sab ko dekhe dikhae baithe hain
chak-e-daman ye kah raha hai ki ham
dil ke tukde udaae baithe hain
vo sar-e-bazm haal kya puchhen
mere matlab ko paae baithe hain
ab ajal kyuun ki aaegi dekhun
vo ayadat ko aae baithe hain
karte hain yuun dua ki ham goya
haath asar se uthae baithe hain
agar aate hain vo to aane do
ham bhi ankhen bichhae baithe hain
us ke dil men asar kar ai girya
ghair kya ghar banae baithe hain
us ke vaade ko jante hain ham
shaam se zahr khaae baithe hain
dar se vahshat-zadon ko khud na utha
ye koi ek jaae baithe hain
ab to lab tak bhi aa na ai naale
ham tujhe azmae baithe hain
tum bhi kar jaao paemal ki ham
naqsh-e-hasti mitae baithe hain
kis ko dekh ai hazrat-e-‘salik’
aaj kuchh munh banae baithe hain