jab dil ki ḳhalish baḌh jaati hai majbur jab insan hota hai
jiina jise mushkil ho jaa.e marna use asan hota hai
aa.i thi javani ham par bhi ham ne bhi baharen dekhi hain
is daur se ham bhi guzre hain ik ḳhvab-e-pareshan hota hai
be-kar hai shikva apnon ka be-sud shikayat ghairon ki
jab vaqt bura aa jaata hai saaya bhi gurezan hota hai
main un ke sitam sab bhuul gaya mujh ko to karam yaad aate hain
vo sar bhi uTha sakta hai kabhi jo banda-e-ehsan hota hai
har-vaqt ulajhte rahte hain ye haath kisi ke daman se
jab hosh mujhe aa jaata hai mera hi gareban hota hai
har ek ko jaana paḌta hai duniya ke musafir ḳhane se
kuchh roz iqamat hoti hai kuchh roz ka mehman hota hai
ai zahid-e-ḳhud-bin rahmat-e-haq aghosh men us ko le legi
jo apne gunahon par dil men har-vaqt pasheman hota hai
jo dekh rahe hain sahil se ye haal bhala vo kya janen
tufan se guzarne valon ko andaza-e-tufan hota hai
ye ishq-o-vafa ki baten hain puchhe koi ‘shankar’ ke dil se
vo samne jab aa jaate hain har saans ghazal-ḳhvan hota hai
Leave a Reply