Shifa Gwaliari
hirs-e-dua na ho havas-e-iltija na ho
ulfat ka jab maza hai koi mudda.a na ho
tu un ki bevafa.i pe shikva-sara na ho
qadr-e-vafa na ho vo agar bevafa na ho
tasvir ban ke dekh ba-adab-e-did unhen
jumbish na ho nigah ko dil bolta na ho
asudagan-e-aish bata.en vo kya kare
jis ko ba-qadr-e-hausla gham bhi mila na ho
ai be-ḳhudi ḳhudi ki taraf aankh pher de
dekhen kahin hijab-e-ḳhudi men ḳhuda na ho
is vaqt shayad un ka pata mil sake tujhe
jab tera apni hasti ki had tak pata na ho
iz.har-e-mudda.a ho ‘shifa’ is ada ke saath
dast-e-dua bhi vaqif-e-nafs-e-dua na ho
Leave a Reply