Salahuddin Nayyar
kam-suḳhan main huun aap kam-amez
dil ka paimana gham se hai labrez
bhigi palkon se ḳhuun Tapakne laga
daman-e-dil jo ho gaya ḳhun-rez
laḌkhaḌate hain maut ke bhi qadam
nashsha-e-zindagi hai kitna tez
ruk ga.e qafile baharon ke
kis ke naale hain itne dard-angez
lab pe hai tanz bhi tabassum bhi
har ada un ki maslahat-amez
dil ki viraniyon ka kya hoga
zindagi tu bhi hai nashat-angez
zabt-e-gham ik tiri navazish se
daman-e-arzu hua ḳhun-rez
saari duniya ko bhuul baiTha huun
teri yaden hain kitni dil-avez
jagmagaya dayar-e-dil ‘nayyar’
jab bhi koi hua tabassum-rez
Leave a Reply