Ai Dil-E-KHud-Na-Shanas Aisa Bhi Kya

ai dil-e-ḳhud-nā-shanās aisā bhī kyā

ā.īna aur is qadar andhā bhī kyā

us ko dekhā bhī magar dekhā bhī kyā

arsa-e-ḳhvāhish meñ ik lamha bhī kyā

dard kā rishta bhī hai tujh se bahut

aur phir ye dard kā rishta bhī kiyā

zindagī ḳhud laakh zahroñ kā thī zahr

zahr-e-ġham tujh se mirā hotā bhī kyā

pūchhtā hai rāh-rau se ye sarāb

tishnagī kā naam hai dariyā bhī kyā

khīñchtī hai aql jab koī hisār

dhuup kahtī hai ki ye saaya bhī kyā

uf ye lau detī huī tanhā.iyāñ

shahr meñ ābād hai sahrā bhī kyā

ḳhud use darkār thī merī nazar

ḳhud-numā jalva mujhe detā bhī kyā

raqs karnā har na.e jhoñke ke saath

barg-e-āvāra hai ye duniyā bhī kyā

ḳhanda-zan ġham par ḳhushī par ashk-bār

in dinoñ yaaro hai rañg apnā bhī kyā

be-tab-o-tāb-e-shuā-e-āgahī

ishq kahiye jis ko vo sho.ala bhī kyā

gaahe gaahe pyaar kī bhī ik nazar

ham se rūThe hī raho aisā bhī kyā

ai mirī taḳhlīq-e-fan tere baġhair

maiñ ki sab kuchh thā magar maiñ thā bhī kyā

naġhma-e-jāñ ko girāñ-goshoñ ke paas

nā-rasā.ī ke sivā miltā bhī kyā

Leave a Comment