Ummeed Fazli
ai dil-e-ḳhud-na-shanas aisa bhi kya
a.ina aur is qadar andha bhi kya
us ko dekha bhi magar dekha bhi kya
arsa-e-ḳhvahish men ik lamha bhi kya
dard ka rishta bhi hai tujh se bahut
aur phir ye dard ka rishta bhi kiya
zindagi ḳhud laakh zahron ka thi zahr
zahr-e-gham tujh se mira hota bhi kya
puchhta hai rah-rau se ye sarab
tishnagi ka naam hai dariya bhi kya
khinchti hai aql jab koi hisar
dhuup kahti hai ki ye saaya bhi kya
uf ye lau deti hui tanha.iyan
shahr men abad hai sahra bhi kya
ḳhud use darkar thi meri nazar
ḳhud-numa jalva mujhe deta bhi kya
raqs karna har na.e jhonke ke saath
barg-e-avara hai ye duniya bhi kya
ḳhanda-zan gham par ḳhushi par ashk-bar
in dinon yaaro hai rang apna bhi kya
be-tab-o-tab-e-shua-e-agahi
ishq kahiye jis ko vo sho.ala bhi kya
gaahe gaahe pyaar ki bhi ik nazar
ham se ruThe hi raho aisa bhi kya
ai miri taḳhliq-e-fan tere baghair
main ki sab kuchh tha magar main tha bhi kya
naghma-e-jan ko giran-goshon ke paas
na-rasa.i ke siva milta bhi kya
Leave a Reply