de kar fareb pyaas ki azurdagi ko ham
aao na ghunT bhar ke piyen zindagi ko ham
khulne lagi hai niind ki bhedon bhari katha
chhune lage hain ḳhvab ki dil-bastagi ko ham
sahra qubul karta hai barish ka indiya
miTTi men gundh lete hain jab tishnagi ko ham
rakh kar hazar a.ine us ruḳh ke ru-ba-ru
dhoka diya karenge tiri sadgi ko ham
raqsan hai boznon ki tarah vaqt be-takan
takte hain putliyon ki tarah DugDugi ko ham
andar hi apne ḳhaak uḌate hain duur tak
bahar nahin nikalte avargi ko ham
hajat ke daam girte nahin hain naqab men
ya.ani hijab karte hain be-pardagi ko ham
sunta tha be-kanar samundar hamari nazm
auron ko bhi sunate rahe dil lagi ko ham
lafzon ki mezbani agar saunp di ga.i
mehman karenge aap ki sanjidgi ko ham
Leave a Reply