aise Dare hain kis ki nigah-e-ghazab se ham
bad-khvab ho gae hain jo do chaar shab se ham
kab kamyab-e-bosa hue us ke lab se ham
sharminda hi rahe dil-e-matlab-matlab se ham
bosa na le sake kaf-e-pa ka adab se ham
katen hain is liye kaf-e-afsos shab se ham
sauda-gar-e-safa-e-dil-e-be-ghubar hain
ajnas-e-shisha laae hain shahr-e-halab se ham
ye roz DhunDh laae hai ik khub-ru naya
shaki hain apne hi dil-e-afat-talab se ham
kashti hamari bahr ki hai manjdhar men
nikle hain kab kashakash-e-lutf-o-ghazab se ham
tarz-e-khiram-e-naz ki be-etidaliyan
dekhen hain aur kuchh nahin kahte adab se ham
burqe men ho ki parda-e-chadar men khub-ru
pahchante hain vaza se shokhi se chhab se ham
shaghl-e-sharab o shisha o saqi-e-naghma-sanj
taaib hue hain alam-e-piri men sab se ham
be-lutf zindagi ke hain din aa bhi ai ajal
tere hi intizar men baithe hain kab se ham
fan itna kam kya hai ki in rozon ‘mushafi’
dil men ik uns rakhte hain sher-e-arab se ham