lutf zindagani ka shauq-e-arzu men hai
jazba-o-junun men hai sa.i-o-justuju men hai
jo sukun-e-ḳhatir hai us ke aib men dilkash
chashni hai luknat hai sehr guftugu men hai
us ke qurb ki lazzat mujh se kya bayan hogi
be-panah kaifiyyat sirf aarzu men hai
zahr zindagani ka pi ke aql aa.i hai
daru-e-gham-e-hasti talḳhi-e-subu men hai
bhiiḌ men zamane ki ham sada akele the
vo bhi duur hai kitna jo rag-e-gulu men hai
baat ‘jami’-sahib ki talḳh bhi hai shirin bhi
dard halka halka sa tarz-e-guftugu men hai
Leave a Reply