Kuldeep Kumar
mausam-e-yad yuun ujlat men na vaare jaa.en
ham vo lamhe hain jo fursat se guzare jaa.en
ho ke rusva vo hua jis ki kabhi hasrat thi
ham tire naam se mahfil men pukare jaa.en
aap ka husn hai jitna bhi numa.ish kiije
haan bas itna hai ki ma.asum na maare jaa.en
yaan se ab rah-e-adam su-e-falak jaati hai
aa.iye paanv havaon men utare jaa.en
ik tire naam ka tha saath ki ab vo bhi nahin
ab tire shahr bhala kis ke sahare jaa.en
ḳhamushi toḌ ke sar le li ye kaisi vahshat
aisa lagta hai ki bas tum ko pukare jaa.en
ho chuka tang main zindan-e-ḳhamoshan se bahut
kuchh parinde hi miri chhat pe utare jaa.en
zindagi bhi to kabhi maujon se laḌ kar dekhe
sirf kya ham ko gharaz hai ki kinare jaa.en
aaj ki raat andheron ki hai darkar mujhe
aaj ki raat miri chhat se sitare jaa.en
Leave a Reply