Basit Bhopali
jaise bhi ye duniya hai jo kuchh bhi zamana hai
sab teri kahani hai sab mera fasana hai
ik barq-e-siyah-masti ik sho.ala-e-mad-hoshi
miina se girana hai saghar se uThana hai
tum tak na pahunch jaa.e lau sham-e-mohabbat ki
jab tuur ko phunka tha ab dil ko jalana hai
mahdud-e-zaban kab tak afsana mohabbat ka
ankhon se bhi kahna hai dil se bhi sunana hai
allah re tanzim hairat-kada-e-hasti
dekho to haqiqat hai samjho to fasana hai
aahen bhi nahin ruktin naale bhi nahin thamte
aur un ko mohabbat ka afsana sunana hai
vo husn-e-mujassam hain ham ishq-e-mukammal hain
un ka bhi zamana hai apna bhi zamana hai
jalve kahin chhupte hain nazren kahin rukti hain
parda na uThana bhi parda hi uThana hai
bulbul ki mohabbat se vo raaz rahe kab tak
kaliyon ki zaban par jo mub.ham sa fasana hai
tadbir bhi ye kah kar ruḳhsat hui furqat men
taqdir ki duniya hai qismat ka zamana hai
kuchh dard ke pahlu hain kuchh yaas ki baten hain
afsana mira kya hai rona hai rulana hai
nakam mohabbat ki allah re majburi
jiine ki nahin fursat marne ko zamana hai
kya qahr hai ai ‘basit’ ye tab-e-haya-parvar
un ki hi mohabbat hai un se hi chhupana hai
Leave a Reply