teri ulfat ko jaga rakkha hai
dil men tufan uTha rakkha hai
ranj-o-rahat hain gile-shikve hain
kaisa ghar-bar saja rakkha hai
us ka ehsan ki us ke dil ne
fasla ham se sada rakkha hai
vaqt kyuun ret sa phisla jaa.e
ham ne muTThi men daba rakkha hai
samne rahte hue bhi us ne
ḳhud ko parde men chhupa rakkha hai
shaad har pal hain ki ham ne dil ko
ḳhugar-e-dard bana rakkha hai
ḳhaar hai jis ki zaban us ne bhi
ghar ko phulon se saja rakkha hai
koi jumbish pas-e-parda ho kabhi
sar tire dar se laga rakkha hai
vo bhi kya dil hai ki jis men ‘anjum’
naam rakkha na pata rakkha hai
Leave a Reply