Ahmad Zafar
ye tera khayal hai ki tu hai
jo kuchh bhi hai meri aarzu hai
dil pahlu men jal raha hai jaise
ye kaisi bahar-e-rang-o-bu hai
taqdir men shab likhi gai thi
kahne ko ye zulf-e-mushkbu hai
vo dast-e-khizan se bach gaya hai
jis phuul men rang hai na bu hai
patthar ko tarash kar bhi dekho
ye fan bhi khuda ki justuju hai
pardes hai shahr shahr mera
aghyar ki jis men aabru hai
taqdis ke sar men khaak dekhi
tahzib ke haath men subu hai
main jiine se tang aa gaya huun
ai maut subut de ki tu hai
dekho to ‘zafar’ kahan hai yaaro
divane ka zikr ku-ba-ku hai
Leave a Reply