afroz-rizvi

Yahi To Meri Wafa Ka Sila Diya Hai Mujhe

yahi to meri vafa ka sila diya hai mujhe

ki tum ne bhuul samajh kar bhula diya hai mujhe

mire khayal ki lau ko bujhane valon ne

charagh-e-rah samajh kar jala diya hai mujhe

kabhi to sar men samaya junun ki surat

kabhi ghubar ki surat uda diya hai mujhe

tumhare qurb ki khvahish ne daman-e-shab par

tumhare vasl ka muzhda suna diya hai mujhe

main aaj dekh rahi huun ki tere kuche men

tiri talab ne fasana bana diya hai mujhe

udasiyon men ati sham-e-gham ki chaukhat par

khayal-e-yar ne kitna rula diya hai mujhe

jahan bhi sham-e-mohabbat jalai hai main ne

hava-e-gham ne vahin par bujha diya hai mujhe

More Poems

Leave a Comment