vo log bhi hain jo maujon se Dar ga.e honge
magar jo Duub ga.e paar utar ga.e honge
lagi ye fikr na.i dil ko aa ke manzil par
kahan bhaTak ke mire ham-safar ga.e honge
palaT ke aankh men vo mauj-e-ḳhun nahin aa.i
chaḌhe hue the jo dariya utar ga.e honge
chale to ek hi raste pe ham magar na mile
mile bhi honge to bach kar guzar ga.e honge
jo maut se na Dare vo bhi tere saath nahin
ki zindagi ke savalon se Dar ga.e honge
jahan ye baagh hai pahle yahan bayaban tha
zarur idhar se tire ḳhush-nazar ga.e honge
jo shah-rahon pe dekhe hain log patthar ke
talab men jiine ki ye su-e-zar ga.e honge
hamari kisht-e-dil-o-jan se us ki mizhgan tak
ye silsile tire ai chashm-e-tar ga.e honge
jo mil gaya hai to ab mujhe se hal-e-hijr na puchh
kisi tarah se vo din bhi guzar ga.e honge
‘salim’ ziist to mushkil thi be-dayaron ki
vatan se duur kahin ja ke mar ga.e honge
Leave a Reply