su-e-sahra hi mujhe le gai vahshat meri
tere dar par na hui aah sukunat meri
hai masihai ka daava to jila le aa kar
dam labon par hai zara dekh to surat meri
main ne bazar-e-jahan men liya sauda tera
husn-e-yusuf pe fida kya ho tabiat meri
bagh-e-alam men gham-e-ishq ka phal rahat hai
mojib-e-izz-o-karamat hui zillat meri
huun main avara-o-gum-gashta rah-e-maqsad ka
hazrat-e-khizr se kya hogi hidayat meri
main muqim-e-dar-e-janan huun vo tanha dasht-navard
josh-e-ulfat men hai kya qais se nisbat meri
ud ke pahuncha sar-e-gardun pe bagula ban kar
baad mitne ke buland utni hai himmat meri
paas mere jo na aae koi shikva kya hai
karti hai be-kasi-e-ishq rifaqat meri
naara-zan raad ke manind gham-e-hijr se huun
sifat-e-‘barq’ tadapne ki hai aadat meri
Leave a Reply