Na Mana Mera Kahna Dil Gaya Kyun Dad-KHwahi Ko

Poet

na maana mera kahna dil gaya kyuun dad-ḳhvahi ko

saza dete hain vaan mujrim bana kar be-gunahi ko

hamari be-kasi ne chhan Daala hai jahan saara

siva tere Thikana hi nahin hai be-panahi ko

qayamat men vo mujh ko dekh kar kahte hain ghairon se

ḳhuda ki shaan hai ashiq chale hain dad-ḳhvahi ko

uḌaa.i ḳhaak us ki ḳhuub ja kar koh-o-sahra men

dil-e-vahshi ne kya ulTe diye chakkar tabahi ko

ujaḌ ja.ega jis din karḳhana bada-ḳhvaron ka

bahut ro.ega saaqi kashti-e-mai ki tabahi ko

bura ho rashk ka rahbar samajh kar dil se jo puchha

adam ka rasta batla diya gum-gashta-rahi ko