Parnav Mishra Tejas
purani yaad ki tamam kirchiyan liye hue
udaas shaam aa ga.i paheliyan liye hue
Tapak paḌa lahu uchhalti machhliyon ko dekh kar
kabhi mile the tum bhi kaj-kulahiyan liye hue
abhi to maut se hain duur zindagi ki pyaas hai
kabhi chalenge us taraf ravaniyan liye hue
Thahar zara mire raqib dost saath saath chal
ham us ki or ja rahe hain kashtiyan liye hue
sada.en aa rahin dayar-e-gham ka baab bhi khula
milegi raat ashiqon ki siskiyan liye hue
dhuan dhuan faza sabhi sitare gum hue kahin
kisi ne khol di hai zulf sardiyan liye hue
main kho raha huun ḳhud ko har talash ḳhatm ho rahi
miri ghazal mili mujhe tasalliyan liye hue
nahin nahin abhi dilon ki bastiyan ujaaḌ do
ki chal rahi ye nasl-e-nau bura.iyan liye hue
koi mira bhi ho sake ye chahta nahin ḳhuda
ata hui hain raunaqen udasiyan liye hue
vo aḳhiri sahar hamen aziiz thi kabhi bahut
jahan bichhaḌ ga.e the tum shitabiyan liye hue
safed rang zindagi ka daagh daagh ho gaya
taḌap raha tamam shab siyahiyan liye hue
Leave a Reply