Rahi Fidai
mata-o-mal-e-havas hubb-e-al samne hai
shikar ḳhud ko bacha dekh jaal samne hai
ḳhayal-e-kohna muqayyad hai teri sochon men
riha.i de ki saza yarghamal samne hai
mujhe malal hai apni falak-nashini par
yahi uruuj ki had phir zaval samne hai
ragon men ḳhuun ke badle machal rahi hai aag
ziyan badan ka na jaan ka vabal samne hai
yahi hai kaba-e-maqsud isi se jalva-e-arsh
uTha le chaah se qut-e-halal samne hai
vo ba-kamal siyaq o sabaq par haavi
guzishta us ki nazar men ma.aal samne hai
saza ki himmat-e-ali bhi ho ga.i paspa
hazar-ha araq-e-infi.al samne hai
ḳhulus sikka-e-uftada jeb-e-hasti ka
uTha ke Daal de dast-e-saval samne hai
hamare sabr ki had ham pe ashkara ho
musabbiba sabab-e-ishti.al samne hai
mujhe aziiz hai sahra-e-mumkinat ki sair
ye aur baat ki bagh-e-muhal samne hai
nazar ba-ḳhair ho ‘rahi’ ki bu-e-gul ki tarah
chhupa hai vo magar us ka jamal samne hai
Leave a Reply