Tariq Qamar
ab-dar-ab mire saath safar karte hain
tishna-lab ḳhvab mire saath safar karte hain
ik siyah-rat ta.aqub men lagi rahti hai
najm-o-mahtab mire saath safar karte hain
dasht-e-ehsas tiri pyaas se main haar gaya
varna sailab mire saath safar karte hain
jante hain ki mujhe niind nahin aati hai
phir bhi kuchh ḳhvab mire saath safar karte hain
ye batate hain kahan baiThna uThna hai kahan
mere adab mire saath safar karte hain
ai samundar main bacha.e hue phirta huun tujhe
saare girdab mire saath safar karte hain
sach to ye hai ki nahin ek bhi sachcha in men
jitne alqab mire saath safar karte hain
ishq tanha hai mire alam-e-vahshat ka gavah
taq-o-mehrab mire saath safar karte hain
kaun samjhega in ashkon ki ibarat ‘tariq’
saare eraab mire saath safar karte hain
Leave a Reply