tumhare honT jin ke zikr ki garmi se jalte hain
hamare jaise divane unhin rahon pe chalte hain
jinhen qirtas par la.un to ik hangama ho jaa.e
shab-e-tanha.i men aksar kuchh aise sher Dhalte hain
batao chain se kaise rahen ham aisi vaadi men
jahan gulshan ke rakhvale hi kaliyon ko masalte hain
tire aage na apna sar jhuka.en to kahan jaa.en
ki ham roz-e-azal se hi tire TukḌon pe palte hain
machal jaata hai dil vaise hi tum ko dekhne ke baad
khilauna dekh kar jis tarah se bachche machalte hain
pahunchti hai maqam-e-intiha par bandagi jis dam
hamare paanv ki Thokar se bhi chashme ubalte hain
tumhari rahbari qaa.em rahegi phir bhi ai ‘rahbar’
nikal jaane do kuchh logon ko gar aage nikalte hain
Leave a Reply