Wali Alam Shaheen
husn par bojh hue us ke hi va.ade ab to
tark kar ai gham-e-dil apne irade ab to
is qadar aam hui shahr men ḳhun-pairahni
nazar aate nahin be-dagh libade ab to
tu Thaharta nahin mere liye phir zid kaisi
qaid is ham-safari ki bhi uTha de ab to
peḌ ne saa.e ke harfon men likha tha jis ko
Dubte chand vo tahrir miTa de ab to
soḳhta lamhe tujhe bar-e-safar hi honge
raakh bhi apne ta.alluq ki uḌa de ab to
ishtihar apna liye phirta huun qarya qarya
kya hai qimat miri ye koi bata de ab to
ḳhud ko pahuncha.i hai kya kya na aziyyat main ne
koi ‘shahin’ mujhe is ki saza de ab to
Leave a Reply