Daftar-E-Lauh O Qalam Ya Dar-E-Gham Khulta Hai

Waheed Akhtar

daftar-e-lauh o qalam ya dar-e-gham khulta hai

honT khulte hain to ik bab-e-sitam khulta hai

harf-e-inkar hai kyuun nar-e-jahannam ka halif

sirf iqrar pe kyuun bab-e-iram khulta hai

aabru ho na jo pyari to ye duniya hai saḳhi

haath phailao to ye tarz-e-karam khulta hai

mangne valon ko kya izzat o rusva.i se

dene valon ki amiri ka bharam khulta hai

band ankhen rahin mela hai luTeron ka laga

ashk luT jaate hain jab dida-e-nam khulta hai

jaan dene men jo lazzat hai bachane men kahan

dil kisi se jo bandhe uqda-e-gham khulta hai

saath rahta hai sada mahfil o tanha.i men

dil-e-ram-ḳhurda magar ham se bhi kam khulta hai

dekho pasti se to har ek bulandi hai raaz

jada-e-koh faqat zer-e-qadam khulta hai

qarz ada karna hai jaan ka to chalo maqtal men

khinch ga.i baag baja tabl-o-alam khulta hai