Ali Sardar Jafri
naghma-e-zanjir hai aur shahr-e-yaran in dinon
hai bahut ahl-e-junun shor-e-baharan in dinon
us vafa-dushman se paiman-e-vafa hai ustuvar
zer-e-sang-e-sakht hai phir dast-e-yaran in dinon
mohtasib bhi halqa-e-rindan ka hai ummid-var
kam na ho jaae vaqar-e-mai-gusaran in dinon
tezi-e-tegh-e-ada ki shohraten hain duur duur
hai bahut abad ku-e-dil-figaran in dinon
dosto pairahan-e-jan khun-e-dil se surkh-tar
badh gaya hai iltifat-e-gul-ezaran in dinon
ahl-e-dil par barish-e-lutf-e-nigah-e-dil-navaz
mehrban hai ishq par chashm-e-nigaran in dinon
hai gada-e-mai-kada ke sar pe taj-e-khusravi
kuza-gar ki gil hai khak-e-shahr-e-yaran in dinon
kya ajab ishrat-kadon par bijliyan girne lagin
hai bahut sarkash nigah-e-sogvaran in dinon
Leave a Reply