Abdur Rahim Nashtar
ghair-abad ilaqe ki faza kaisi hai
dil se uthti hai jo rah rah ke sada kaisi hai
mere pairon se lipatti hi rahi mauj-e-ravan
ret se kar na saki mujh ko juda kaisi hai
tuut kar aai hai lahrai hai charon janib
ye barasti hi nahin kaali ghata kaisi hai
pattiyan dhuup men kumhla gaiin phike hue rang
chhanv utri hi nahin ab-o-hava kaisi hai
baasi phulon ko na jhulsae to suraj kaisa
taaza kaliyan na khilae to saba kaisi hai
kyuun nahin girte saron pe ye hava ke neze
gharq karti hi nahin mauj-e-fana kaisi hai
zard alfaz ka zahrila bhayanak aaseb
mere ghar chhod gai meri sada kaisi hai
shahr-e-afsun mujhe avaz de patthar kar de
main ise dekh to luun meri khata kaisi hai
Leave a Reply