Aa Hi Jaegi Sahar Matla-E-Imkan To Khula

aa hi jaegi sahar matla-e-imkan to khula

na sahi bab-e-qafas rauzan-e-zindan to khula

le ke aai to saba us gul-e-chini ka payam

vo sahi zakhm ki surat lab-e-khandan to khula

sail-e-rang aa hi rahega magar ai kisht-e-chaman

zarb-e-mausam to padi band-e-baharan to khula

dil talak pahunche na pahunche magar ai chashm-e-hayat

baad muddat ke tira panja-e-mizhgan to khula

dard ka dard se rishta hai chalo ai ‘majruh’

aaj yaron se ye ik uqda-e-asan to khula