Majeed Amjad
jo dil ne kah di hai vo baat an-kahi bhi na thi
ye mauj to tah-e-dariya kabhi rahi bhi na thi
jhuken jo sochti palken to meri duniya ko
Dubo ga.i vo nadi jo abhi bahi bhi na thi
sarak gaya koi saaya simaT gaya koi duur
kisi ke aks ki pyasi kashish sahi bhi na thi
suni jo baat koi an-suni to yaad aaya
vo dil ki jis ki kahani kabhi kahi bhi na thi
nagar nagar vahi ankhen pas-e-zaman pas-e-dar
miri ḳhata ki saza umr-e-gumrahi bhi na thi
kisi ki ruuh tak ik fasla ḳhayal ka tha
kabhi kabhi to ye duuri rahi-sahi bhi na thi
nashe ki rau men ye jhalka hai kyuun nashe ka shu.ur
is aag men to koi ab-e-agahi bhi na thi
ghamon ki raakh se ‘amjad’ vo gham tulua hue
jinhen nasib ik ah-e-sahr-e-gahi bhi na thi
Leave a Reply