dil men utri hai nigah rah gaiin bahar palken
kya khadang-e-nigah-e-yar ki hain par palken
fart-e-hairat se ye be-his hain sarasar palken
ki huiin aina-e-chashm ki jauhar palken
ye darazi hai ki vo shokh jidhar aankh uthae
ja pahunchti hain nigahon ke barabar palken
kya tamasha hai ki daale mire dil men surakh
aur khuun men na huiin un ki kabhi tar palken
nargis us ghairat-e-gul-zar se kya aankh milae
aankh bhi vo ki nahin jis ko mayassar palken
hai gham-e-marg-e-adu bhi but-e-kafir ka banav
qatra-e-ashk se hain rishta-e-gauhar palken
chaat deta hai tira dil unhen khun-rezi ki
tez karti hain isi sang pe khanjar palken
li gaiin dil ko vo duzdida nigahen ab yaan
kya dhara hai jo chadha laati hain lashkar palken
kiina kuchh shart nahin un ki dil-azari ko
nish-e-aqrab hain tiri shokh sitam kar palken
hai yahi girya-e-khunin to kisi din ‘nazim’
yuun hi rah jaengi aapas men jhapak kar palken