Maratib Akhtar
tu ja rahi hai chhoḌ ke ja phir kabhi sahi
ai bastiyon ki tez hava phir kabhi sahi
ab aadmi ki jis pe musallat machine hai
ab zar ki justuju hai ḳhuda phir kabhi sahi
tujh ko Dubo gaya tujhe barbad kar gaya
ye takiya-e-kalam tira phir kabhi sahi
is vaqt ek rabt-e-musalsal hai na-guzir
pabandi-e-quyud-e-ana phir kabhi sahi
main apne iztirar se majbur ho gaya
us ne bigaḌ ke mujh se kaha phir kabhi sahi
Leave a Reply