Daniyal Tareer
ek bujhao ek jalao ḳhvab ka kya hai
ankhon men rakh kar so jaao ḳhvab ka kya hai
panv-tale hai raund ke guzro kuchal ke dekho
pichhe jaao aage aao ḳhvab ka kya hai
shelf pe ulTa kar ke rakh do aur bisra do
gul-danon men phuul sajao ḳhvab ka kya hai
ḳhvab ka kya hai raat ke naqsh-o-nigar banao
raat ke naqsh-o-nigar banao ḳhvab ka kya hai
niind mili hai guḌ se miThi shahd se shirin
gaao nacho nacho gaao ḳhvab ka kya hai
la-yani hai sab la-yani ya.ani ya.ani
aur kahani likh kar laao ḳhvab ka kya hai
ek kabaḌi galiyon avaz laga.e
raakh ḳharido aag ke bhaav ḳhvab ka kya hai
Leave a Reply